ԻՐԱՆԻ ՄՇԱԿՈՒՅԹԻ ՕՐԵՐԸ ՄԱՏԵՆԱԴԱՐԱՆՈՒՄ

03 նոյեմբերի, 2021

Հայաստանի և Իրանի միջև դիվանագիտական հարաբերությունների հաստատման 30-ամյակին ընդառաջ 2021 թ․ նոյեմբերի 3-ին Մաշտոցյան Մատենադարանում մեկնարկել են Իրանի մշակույթի օրերին նվիրված միջոցառումները։ Մամուլի ասուլիսում Մատենադարանի տնօրեն Վահան Տեր-Ղևոնդյանը և Իրանի Իսլամական Հանրապետության Մշակույթի Կենտրոնի խորհրդական Սեյյեդ Հոսեյն Թաբաթաբային ներկայացրել են առաջիկայում իրականացվելիք ծրագրերը։ Ասուլիսին մասնակցել է նաև ծրագրի շրջանակում Հայաստան ժամանած իրանական ձեռագրերի վերականգնման առաջատար մասնագետ Համիդ Մալեքյանը ։

Հայ-իրանական քաղաքական, պատմական ու մշակութային առնչությունները գալիս են հազարամյակների խորքից: Մեսրոպ Մաշտոցի անվան Մատենադարանում պահվում են հարյուրավոր պարսկերեն ձեռագրեր և վավերագրեր, որոնք առավել ակնառու են դարձնում երկու ժողովուրդների դարավոր կապերը: Իրանական հավաքածուն ոչ միայն ամենահարուստներից է Մատենադարանի օտարալեզու ձեռագրերի շարքում, այլև գտնվում է ուսումնասիրման և վերականգնման աշխատանքների առաջնահերթությունների շարքում:

Այս միջոցառումների շարքում Մատենադարանը նախաձեռնել է նաև «Ղաջարական դարաշրջանի ձեռագրակազմերի վերականգնման» տեսական և գործնական դասընթացներ:

Հայաստանի և Իրանի միջև դիվանագիտական հարաբերությունների հաստատման 30-ամյակին նվիրված միջոցառումներից էր նաև 2021 թ․ նոյեմբերի 25-ին Մաշտոցյան Մատենադարանում տեղի ունեցած Արևելագիտության բաժնի ավագ գիտաշխատող, պ.գ.դ. Քրիստինե Կոստիկյանի «Մատենադարանի պարսկերեն հրովարտակները» գրքի շնորհանդեսը և Իրանի Ղաջարական դարաշրջանի մշակույթին նվիրված ցուցադրության բացումը։ Ցուցահանդեսի շրջանակում ներկայացվել են Մատենադարանում առկա Ղաջարական դարաշրջանի նկարազարդ ձեռագրեր, հրովարտակներ, այդ ժամանակաշրջանին բնորոշ ինքնատիպ կազմեր և Իրանի Նասեր Էդ-Դին շահի անձնական լուսանկարիչ Իրանում գեղարվեստական լուսանկարչության հիմնադիր Անթուան Սևրուգինի գործերը։ Առաջին անգամ ցուցադրվել են արվեստաբան, Մատենադարանի ավագ գիտաշխատող, ցուցահանդեսի համադրող Իվեթ Թաջարյանի անձնական հավաքածուից դեկորատիվ-կիրառական արվեստի նմուշներ, գործվածքներ և տարազ։

https://m.youtube.com/watch?v=OflVmltaRMM#bottom-sheet

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր